A música tradicional resoará no castelo do Bolo esta fin de semana

O 30 de outubro cantoras, trompetistas e gaitas, achegaranse ao castelo de O Bolo para homenaxear ao músico coruñés Xosé Casal e recordar a Dona Urraca.

Esta fin de semana, en concreto o próximo día 30 de outubro, celebrarase o IV Festival e Feira Medieval no castelo do Bolo. Os actos festivos comezarán xa pola mañá coa inauguración da feira e o mercado medieval ás 11.00 horas e continuarán a partir das 17.30 da tarde coa celebración do festival musical que contará coa participación de músicos como os trompetistas medievais, a Banda de Gaitas do Cocnello do Bolo, a Banda de Gaitas da Deputación ou a Agrupación Os Gaiteriños da Coruña. No evento realizarase unha homenaxe a Xosé Casal, polifacético gaiteiro coruñés e cuxa imaxe aparece representada no cartel do evento.

Tamén actuarán as Cantoras de Trives, as Cantareiras da Real Banda, Jacinta Fernández (cantora da seitura de Lentellais), Xabier Franco (gaiteiro á usanza medieval) ou Roxelio de Acebeda e Xoán Carlos Rilo.

Sen dúbida unha das actuacións máis notables e recoñecidas é a achega de María do Ceo ata o concello bolés para participar tamén neste evento musical.

No festival estrearase tamén un romance homenaxe a Dona Urraca, persoaxe histórico que se sitúa en diversos lugares da comarca valdeorresa entre eles o concello do Bolo no que deixou a súa pegada histórica.

O festival foi presentado onte no Pazo Provincial polo alcalde do Bolo, Manuel Corzo, o presidente da Real Banda de Gaitas da Deputación, Xosé Lois Foxo, o vicepresidente da Deputación de Ourense, César Fernández, e a cantante María do Ceo.