A viticultura é un legado que Valdeorras segue a manter, e aínda que hai evidencias da existencia de viño anterior aos romanos, foi nesa época na que a vide se converteu na clara protagonista da paisaxe natural deste val xunto coa compañía dos soutos de castiñeiros.

A denominación de orixe Valdeorras é o berce duns viños que non deixan de sorprender aos viaxeiros e, aínda que o godello e a mencía son as variedades máis recoñecidas, as adegas valdeorresas tamén elaboran sousón, garnacha tintureira, e moitas outras coupages de variedades que agradan o padal dos que visitan as terras valdeorresas.

Destacar sobre todo a existencia de Covas Tradicionais escavadas na terra para a garda do viño polo seu frescor e humidade. Existen varias zonas na comarca nas que existen covas que poden visitarse para coñecer estas marabillas da arquitectura tradicional. Algúns dos respiradoiros que teñen estas covas, que gardan similitude con chemineas e están feitos na súa maioría en pedra de louxa, son hoxe en día monumentos tradicionais na nosa comarca.

Se queres probar os viños de Valdeorras non deixes de pedilos nalgún dos bares, restaurantes ou cafeterías da nosa comarca, estamos seguros que atoparás onde tomar un viño que che resulte apaixonante, nun lugar que atopes encantador. Aquí neste enlace atoparás a Guía de restauración 2022 do noso concello (ir a FOLLETOS DIXITAIS), onde atoparás os restaurantes que atoparás no noso concello e os seus contactos.

Se o que queres é coñecer unha bodega, visitar unha viña ou visitar unha cova tradicional, tes que achegarte á páxina da Asociación Ruta do Viño de Valdeorras onde atoparás todos os contactos das bodegas que pertencen á mesma e que serán necesarios para organizar a túa visita.

Se prefires unha visita xa organizada, tanto a bodegas como a viñas ou a covas tradicionais, podes falar coas dúas empresas de enoturismo que existen na nosa comarca: Valdeorras es Vino, y Enoturismo Galicia, que saberán organizar a cita ao teu gusto e baixo os teus requisitos.

Se o que queres é comprar viño de Valdeorras existen tendas especializadas que seguro che encantará coñecer. Na localidade do Barco temos Asados y Bodega Peyma (Av. Marcelino Suárez, nº21, 32300 O Barco, 988 68 48 06) con referencias de moitas bodegas de Valdeorras. En A Rúa, temos a única viñoteca da comarca, rexentada pola enóloga Cecilia Fernández (Av. Campogrande 70, Bajo, 32350, A Rúa, 988 00 81 68) e que conta con máis de 100 referencias de viño, licores e espumosos de Valdeorras.

Se queres comer ou cear dentro dunha cova tradicional, tes que poñerte en contacto coa Cova da Xabreira en Seadur, onde con reserva previa, poderás desfrutar do único restaurante-cova de Valdeorras.